Occitan

Lo jornal l’International del 28 de julhet de 1850 conta lo sejorn de Jansemin a Baiona e a Biàrrits e publica son poèma a Baiona : « Cada visita se transforma en sesilha literària, ont un public avid s’acampa pertot coma per encantament ; e aquí, pendent doas oras, rison e ploran jos la votz pertocanta del poèta inalassable... »

A Baiona

Trobador, pelerin, trimam l’estiu, l’ivèrn
Ai vist florir pertot de vilas sur de trònas
Més per se rafresquir n’aviái que de Garònas
Voliái veire la mèr abans de m’entornar
L’aviái vista a Marselha e la trobèri bèla
O més aquèla n’es que la mèr domaisèla
Per la franchir sans fatigar
Non cal qu’un jorn a l’irondèla…
Biarrits l’autra mèr, ches tu mon uèlh la tròba
Més aquèla es la granda ! … Es sans fin per naviòu…
D’aiga autant que de cièl ! L’òme n’es res aciu ;
E ma Musa escrasada, oblidant tot escriu,
Davant la mèr que tòca als quatre punts del glòba
Es tombada a ginolhs de la grandor de Diu !
Apuèi de cap a tu ma Musa s’es virada,
Baiona, e fièrament tres còps t’a saludada ;
Sès bèla tu dins tos canons bracats ;
De la França barres l’entrada
Als espanhòls descadenats :
Terrible dins la guèrra, e bona dins la patz,
Recèbes l’estrangèr ; … jamai non copes malha
Mais se te parla de batalha
Li fas veire tos filhs e tos mila soldats ;
Amai ta citadèla ont los canons se pincan ;
E tos ponts-levis que carrican
E la mòrt qu’a talent al fons de tos valats !
Sès bèla ! Sès fòrta, Baiona
Al combat sès una liona ;
As tanben lo mai polit nom
Car pòrtes escribut en estèlas al front
Aquèls quatre mots per corona
Jamai presa e vièrge d’afront

Lire la traduction

Jean-Pierre Hilaire - 06 76 47 32 12 - jean-pierre.hilaire@wanadoo.fr

Des suggestions pour cette rubrique ?