Gaireben 4 ans fa que Cristian Rapin, una figura giganta del mond occitan a desaparegut. A l’iniciativa d’Agenés Tèrra Occitana, se li rendèt omenatge a Tonens, en preséncia d’un quarantenat de personas. Èra nascut dins la region parisenca dins una familha de tonenqueses. Venguèt professor d'espanhòl puèi d'occitan e acabèt coma conselhièr pedagogic per l'occitan dins Òut e Garona. Fondèt amb Marcèu Esquiu e Joan Rigosta l'Escòla Occitana d'Estiu de Vilanuèva d’Òut que festejèt son 50en anniversari en 2024. Éra un poèta qu’« a lo cap dins las estelas e los pès dins Garona ».
Garona I La reflambor coma una nafra Sul sensible orizont Fissonat pels cloquièrs E per las torres màgers Garona epica dins lo ser Cimossa lo gravièr E banha dins sas aigas Los mascles lumenièrs Lo pont-canal escambarlat D’entrelutz abramat Avala los ausèls Coma un grand aranhòl
Èra un romancièr amb « lo libre de M'Orgèn », un roman epic de Sciéncia Ficcion. Son autre roman « Ego nominor Leo » es un « thriller » que se debana en Argeria, Israèl e dins Agenés. Las « Nòvas agenesas », centradas sus la vila d'Agen, illustran plan la modernitat de son òbra. Èra un lexicograf que, al tèrme d'un trabalh de 20 ans, a produch un diccionari francés-occitan enciclopedic. Èra un militant occitan que militava a sa faiçon, en escotant sos interlocutors abans d'expausar sas idèas. Degun es profèta dins son país coma se ditz. Cristian Rapin merita d’èsser melhor conegut e reconegut. Es un illustre agenés.
Lire la traduction
Jean-Pierre Hilaire - 06 76 47 32 12 - Jean-pierre.hilaire@wanadoo.fr